الثانوية العامة ليست النهاية بل البداية

                                                              الثانوية العامة 

ناس كتير بالنسبالها الثانوية دى اخر الحياة بجد نفسى اسالهم ليه ؟؟؟ ، الثانوية مجرد بداية للحياة سواء جبت مجموع او مجبتش ، مادام انت عملت اللى عليك خلاص يبقى سيب الباقى على ربنا وميهمكش النتيجة لانك لازم تكون واثق ان ربنا كبير وعمره ماهيختارك حاجة وحشة ، ربنا بيحب الخير لينا وعلشان كده مهما كان الموضوع صعب لازم تثق بحكم ربنا ، مش يمكن ده اختبار من ربنا ليك ؟؟؟ ولو نجحت فى الاختبار ده ربنا يديك اكتر من اللى كنت بتحلم بيه كمان ، انا عارفة قد ايه الموضوع صعب لان الثانوية كانت اكبر صدمة فى حياتى واكتر سنة تعبت فيها بس كل لما افكر فيها اقول الحمدلله على كل حال ، بزعل اول لما اسمع عن اخبار ناس بتنتحر علشان مجموع وحش ، بزعل عليهم لانهم كان قدامهم فرصة يدخلوا كليه ويجتهدوا فيها ويمكن يطلعوا احسن من اللى دخلو كليات قمة ، لكن بانهم ينتحروا هما كده خسروا دنيا واخرة سوا وده من غير اى فايدة ، انا شايفة ان المجتمع اللى عندنا هو السبب فى تضخيم موضوع الثانوية العامة ده ، بالنسبة للمجتمع لومدخلتش كلية قمة او مجبتش مجموع انت كده فاشل مش عارفه ليه ؟؟؟، وده سبب تاخر التقدم عندنا لان الناس بتدخل كليات القمة علشان يتقال دكتور او مهندس مش علشان هو حابب ده فبالتالى ميجتهدش فى اللى بيعمله فيتخرجوا زى مابيقولوا بالعافية وبالتالى انتاجيته ف العمل بتبقى ضعيفه ، طب وليه كل ده ؟ ، وفى رأيي ده سبب مهم من اسباب تقدم الغرب عن العرب لان الغرب عندهم كل واحد بيدخل الكلية اللى حاببها هو مش لازم دكتور او مهندس  وبالتالى بيشتغل ويدرس فيها بحب فتكون انتاجيته اعلى بكتير من الل داخل حاجة مش حاببها وانما داخلها لمجرد الاسم فقط ، للاسف الناس فى الوطن العربى وخاصة مصر بتحكم على المظاهر والمكانة وده سبب لتأخر حاجات كتير ....

فيا عزيزى الطالب // لا تحزن على المجموع اجتهد فى الكلية اللى هتدخلها واثبت للجميع انك مش فاشل وانك ممكن تكون انجح من بتاع الطب او الهندسة وتكون مراتبك اعلى منهم وتجيب دخل اعلى منهم وساعتها الكل هيعملك الف حساب وهيضربوا بيك المثل على مجهودك ونجاحك العظيم وتذكر دائما ان الله معك ، مهما اصابك من بلاء فلاتيأس من رحمة الله تعالى فقد قال سبحانة ( وَلَا تَيْأَسُوا مِن رَّوْحِ اللَّهِ ۖ إِنَّهُ لَا يَيْأَسُ مِن رَّوْحِ اللَّهِ إِلَّا الْقَوْمُ الْكَافِرُونَ ) سورة يوسف    

وتذكر دائما الثانوية ليست النهاية وانما البداية لحياة افضل فلا تدع اليأس والحزن يهزمك ، فعندما تتغير الحياة لتصبح اصعب غير نفسك لتكون اقوى ، انت تستطيع ولا تصدق من يخبرك بعكس هذا

                                                                 

  الكاتبة / الابتسامة